Studentmållaget i Nidaros

Årsmøte i SmiN

Fridtun — Wed, 20 Jan 2010 10:24:26 +0000

Gode lagslemer,

styret kallar inn til årsmøte i Studentmållaget i Nidaros (SmiN)
onsdag 3. februar. Møtet skal vera i BUL-lokalet i Dronningens gate
23, og møtet tek til *klokka 18.00*.

Saklista for årsmøtet ser slik ut:

- Årsmelding for 2009
- Arbeidsprogram for 2010
- Rekneskap for 2009 og budsjett for 2010
- Jamvekt for 2009 og medlemspengesats for 2010
- Val
* av styre
* av utsendingar til landsmøtet i Norsk Målungdom
* av utsendingar til landsmøtet til Noregs Mållag

Styret sender ut sakpapira so snart dei er klåre.
Du må vera på e-postlista vår dersom du skal få sakpapira, eller be om at me sender dei i posten.

Alle medlemer er hjarteleg velkomne. Det vert enkel servering og ei
lita samkome etter at møtet er ferdig.

Beste helsing
Kristin Fridtun
for styret i SmiN

Eksamensfrukost

Fridtun — Wed, 18 Nov 2009 08:25:26 +0000

Onsdag 25. november vert det atter eksamensfrukost med Studentmållaget.

Me skal vera på Dragvoll, rom D111. Gildet tek til i 8-tida, og varar til om lag 9.00 (det vil seia at det er gløgt å koma ei god stund før 09.00, slik at det er mat att og tid til å tyggja!)

Studentmållaget diskar opp med brød, pålegg og drykk.
Merk: Du må vera medlem i laget for å nyta av den innkjøpte maten, men det er fullt lovleg å ta med eigen mat og eta den i lag med oss, dersom du av ein eller annan (utruleg) grunn ikkje er medlem i SmiN.

Hjarteleg velkomne til ein knallstart på ein “no-må-eg-lesa-til-eksamen”-dag!

Helsing frå styret

Psst! Bilete frå førre eksamensfrukosten kan du sjå her.

Studiemøte

Fridtun — Sat, 31 Oct 2009 17:32:44 +0000

Onsdag 4. november skipar SmiN til studiemøte. Emnet for møtet er tolleg vidt: To nykelord er nynorsk og innvandring, eller nynorsk i det fleirkulturelle samfunnet. Målet med møtet er at me skal lufta tankane, diskutera og drøfta og læra av kvarandre.
‘Studiemøte’ er ingen fast sjanger, so me fylgjer ordskiftet dit det tek oss.

Møtet er ope for alle og det er ingen krav til førekunnskapar. Det einaste som trengst, er ein nyfiken hug og hjarte for nynorsk. Skrivaren i Norsk Målungdom, Eva Holthe Enoksen, leier møtet.

Me har lagt opp nokre tekster som det kan vera greitt å glytta på, mellom anna ‘Program for Noreg som fleirkulturelt samfunn’ (vedteke på NMU-landsmøtet i mars) og innleiingar av mållagskaren Ingar Arnøy og Kristin Fridtun. Desse kan de få tak i ved å senda oss ein e-post (styret@smin.no)

Møtet skal vera på Dragvoll, og det tek til klokka 19.00. Me møtest framfor Tapir bokhandel. (Meld ifrå dersom du treng hjelp til å finna fram)

Hjarteleg velkomne!

Nytt semester kakkar på døra

Fridtun — Sat, 08 Aug 2009 09:46:28 +0000

No er det like før haustsemesteret 2009 tek til, og me i SmiN gler oss storleg til å ta fatt på stort og smått av nynorsksaker. Me skal verta kjend med fleire nynorskskriblande studentar, fara på tilskipingar, skriva kvasse lesarbrev og glupe stykke for nynorskblada, arrangera ymse møte og småsamlingar her i bartebyen. Det er mange ting å sjå fram til i haust, til dømes dette:

8. september klokka 19.00: Forfattarmøte med Brit Bildøen på Café Ni Muser. Nidaros Mållag er tilskipar.

28. og 29. september klokka 17.00-21.00 på D6 på Dragvoll: Nynorskkurs med Ingar Arnøy frå Noregs Mållag. Merk: 28. september er fødedagen åt SmiN!

17. oktober klokka 13.00: Barneboksmøte med Ingelin Røssland på Folkebiblioteket i Trondheim (Rådhussalen). Nidaros Mållag er tilskipar.

23.-25. oktober: “Vend vinden”-konferanse. Norsk Målungdom er tilskipar.

Elles reknar me med at det innimellom dette vert ymse småsamlingar og møte og filmkveldar og so bortetter og bortetter – og eksamensfrukost og grautkveld når semesteret går mot slutten.

Forseinka bursdagshelsing til Ivar Aasen (196 år på onsdag) og til lukke med semesterstarten!

For SmiN-styret

Kristin

Eksamensfrukost mai 2009

Fridtun — Fri, 08 May 2009 06:13:25 +0000