Studentmållaget i Nidaros » Ymse

Vinterleir på Røros 27.-29. januar

Fridtun — Fri, 13 Jan 2012 12:18:34 +0000

Hei, målstudentar!

Kom i hug at NMU skipar til vinterleir like i nabolaget (på Røros) 27.-29. januar. Ta kontakt med Skrivarstova eller SmiN-styret om du har praktiske eller upraktiske spørsmål. Hiv deg med!

Du kan lesa meir om leiren her.

Joleavslutning på Mikro’n

Fridtun — Tue, 06 Dec 2011 12:13:03 +0000

Godtfolk! Haustsemesteret dreg seg mot slutten, og tradisjonen tru skipar SmiN til joleavslutning for alle medlemene i laget (det er lov å ta med seg ein ven eller to òg). Storhendinga er lagd til fredag 9. desember, frå klokka 20.00, på Mikrobryggeriet. De er alle hjarteleg velkomne til ei hyggjeleg førjolsstund!

Sumaravslutning på Rockheim

Fridtun — Mon, 16 May 2011 10:41:01 +0000

Gode SmiN-ar!

Det lir mot sumar og studiefri, og i år har me i Studentmållaget tenkt å avslutta semesteret med ein tur til Rockheim. Avslutninga blir alt på fredag fyrstkomande(20. mai), klokka 17.00. SmiN kostar billetten din (hugs studentprov!).

Me er leie for at denne innbydinga kom so seint ut, men me håpar at mange har tid og lyst til å hiva seg med likevel. Hjarteleg velkomen!

Her kan du sjå korleis du kjem deg til Rockheim.

Elles vil me i styret nytta høvet til å seia god 17. mai, og god sumar!

Bestehels
Kristin Fridtun
for SmiN-styret

God jol til alle SmiN-arar og nynorskingar

Fridtun — Tue, 09 Dec 2008 13:46:03 +0000

Me i SmiN-styret seier takk for i år og ynskjer alle ei knakandes god jol! 2008 har vore eit rikt og metta år med både sigrar og nederlag. Det var stas å endeleg få ein kinofilm med nynorsk tekst, men det var likso leitt å måtta ta runden om målform i eksamensoppgåver endå ein gong. Me vonar medlemene vil vera med på dansen neste år òg, kan henda vert det fleire store framsteg og sigrar for målungdomen og nynorsken.

Beste helsing frå Silje, Aline, Ola, André og Kristin.

SmiN på veven!

Fridtun — Wed, 10 Sep 2008 18:50:31 +0000

Velkomen til den nye vevstaden til Studentmållaget i Nidaros! Vi fekk om senn skipa ei ovgod heimeside som skyv gamlesida langt ned i støvlane. Den nye vevstaden har ein gild og sjølvlaga SmiN-bunad, og sidene er lettare å stella med og greiare å finna fram i. Dimed kjem vi til å bruka og oppdatera vevstaden mykje oftare enn tidlegare, og vi vonar medlemer og andre som er huga på SmiN og nynorsk vil ta han i bruk og ha glede av han. Dette vert ein viktig kanal for SmiN!

På vevstaden kjem vi til å leggja ut bilete frå samlingar og aksjonar, nyhende og meldingar av ymse slag, lesarbrev, ulike andre tekster, kanskje ei teikneseriestripe eller to, framtidsplanar og liknande. Attåt har vi ein kalender som ein lett kan bla seg att og fram i. Vi tek gjerne imot innspel og framlegg til korleis ny-veven kan verta ENDÅ betre.

Eit heitt tips er å sjå kor gjæve sidene om ordlistene våre er vortne. Vi har gjort om listene til ein ordlistedatabase so det skal vera greitt og endeframt å finna ordtilfang. Dimed kan ein sjekka ut Realfaglista i noko anna enn PDF-format.

Atter ein gong: velkomen til vevstaden! Vi vonar dette vert ein base for SmiN-arar og andre med same interesse for språk generelt og nynorsk spesielt. Her skal det finnast knask for alle som er huga på språkpolitikk og ålment målarbeid. Sidan vi er studentar driv vi ikkje berre med politikk og aksjonar, vi lagar òg ein haug sosiale samlingar som vi kjem til å blesta på heimesida. Hiv deg med!

Beste helsing

SmiN-styret