Studentmållaget i Nidaros » Nyhende

Uadressert bokmål? Nei takk!

Fridtun — Sun, 09 May 2010 16:55:10 +0000

Studentmållaget i Bergen har laga nokre spildrande nye og ovende gilde klistremerke som vi rår dykk til å glytta på. Morosame saker! De kan tinga merka her.

Nytt semester kakkar på døra

Fridtun — Sat, 08 Aug 2009 09:46:28 +0000

No er det like før haustsemesteret 2009 tek til, og me i SmiN gler oss storleg til å ta fatt på stort og smått av nynorsksaker. Me skal verta kjend med fleire nynorskskriblande studentar, fara på tilskipingar, skriva kvasse lesarbrev og glupe stykke for nynorskblada, arrangera ymse møte og småsamlingar her i bartebyen. Det er mange ting å sjå fram til i haust, til dømes dette:

8. september klokka 19.00: Forfattarmøte med Brit Bildøen på Café Ni Muser. Nidaros Mållag er tilskipar.

28. og 29. september klokka 17.00-21.00 på D6 på Dragvoll: Nynorskkurs med Ingar Arnøy frå Noregs Mållag. Merk: 28. september er fødedagen åt SmiN!

17. oktober klokka 13.00: Barneboksmøte med Ingelin Røssland på Folkebiblioteket i Trondheim (Rådhussalen). Nidaros Mållag er tilskipar.

23.-25. oktober: “Vend vinden”-konferanse. Norsk Målungdom er tilskipar.

Elles reknar me med at det innimellom dette vert ymse småsamlingar og møte og filmkveldar og so bortetter og bortetter – og eksamensfrukost og grautkveld når semesteret går mot slutten.

Forseinka bursdagshelsing til Ivar Aasen (196 år på onsdag) og til lukke med semesterstarten!

For SmiN-styret

Kristin

SmiN i Dusken att

Fridtun — Wed, 03 Dec 2008 19:12:59 +0000

Lesarbrevet vårt om eksamensoppgåve-striden ligg ute på underdusken.no no, de kjem dit ved å trykka her.

Og kom i hug å melda ifrå dersom de ikkje fær eksamenen på målforma dykkar!

SmiN i Dusken att

Simon Hansen — Thu, 20 Nov 2008 13:14:47 +0000

I nummer 16 av Under Dusken kan du lesa om korleis nynorskstudentar ved NTNU støtt får eksamen på bokmål. Mange av dei tilsette ved NTNU nektar å laga oppgåvesettet på nynorsk, og det mest nytta motargumentet er “det er ikkje mitt språk”, “eg kan det ikkje”, “kva er poenget, de forstår jo bokmål?”, “det finst ingen terminologi” og so bortetter. Eit av institutta har til og med ein stygg uvane: dei gjev eksamensoppgåvene som vedlegg, og trur dimed at dei kjem seg unna, for vedlegg treng berre liggja føre på éi målform (jf. forskrift for målform i eksamensoppgåver).

Takk vere nynorskstudentar som sende inn klage vart Språkrådet merksame på saka no i vår, og dei arbeider enno med å få NTNU til å sjå gjennom rutinane sine. Det trengst, ser det ut til, for ho som uttalar seg for NTNU i UD-artikkelen seier ho ikkje kjenner til professorar som ikkje kan skriva nynorsk. Litt lengre ned på sida er Hansen frå fysikk prov på at dei finst. Vel, vel. Det er enno mykje att å gjera!

Dette er eit av arbeidsfelta til SmiN, og me har samla saman råd og hjelp på eksamenssida vår.

Heng gjerne opp eksamensplakaten vår på lesesalen din. Ta kontakt om du vil vita meir om rettane dine.

SmiN på radio!

Fridtun — Mon, 06 Oct 2008 21:44:18 +0000

No ja, SmiN og SmiN, NMU-leiar Jens Kihl talar i alle fall svært so godt om SmiN i eit intervju som de kan høyra om de klikkar dykk inn på “SmiN i media” i lista til venstre her. Språkteigen-klippet vart sendt i dag, og det gjeld sjølvsagt “Tropa de Elite”-tekstingi. Kosmorama-aksjonen vår i vinter sette det heile i gang. So, atter ein gong: klapp på skuldra til SmiN-arane!