“Eg stend eg, seddu” (Olav H. Hauge):
Studentmållaget kjem til å stå på stand på Dragvoll måndag 26. april (frå 11.00 til 14.00) – då er alle velkomne bortom til ein prat eller litt “munngodt” eller berre for å sjå litt på tilfanget me har. Me sel ordlister, Nynorsknøkkelen, jakkemerke, songbøker og slikt noko for ein rimeleg penge. Me i styret er huga på verta kjende med resten av lagslyden, so gleda vert stor om du stikk innom.

“Dei som har munn, søkjer mat” (gamalt ordtøke)
Torsdag 6. mai skipar me til eksamensfrukost. Gildet skal vera i rom D111 på Dragvoll (atter på Dragvoll…). Me tek til klokka 08.00 og reknar med å svelgja siste brødbiten innan klokka 09.00.
Studentmållaget ordnar med brød, pålegg, varm og kald drykk, papir og godt selskap – so berre kom som du er!

Me skal skipa til sumaravslutning òg, men det vert nærmare semesterslutt.

Vona er at me òg skal få i stand eit ope møte/studiemøte i vår, og me skal sjølvsagt melda ifrå både her og på e-postlista dersom det vert noko av.

Då står det berre att å ynskja alle lagslemer god vår og god eksamenslesing! (eller oppgåveskriving)

styret kallar inn til årsmøte i Studentmållaget i Nidaros (SmiN)
onsdag 3. februar. Møtet skal vera i BUL-lokalet i Dronningens gate
23, og møtet tek til *klokka 18.00*.

Saklista for årsmøtet ser slik ut:

- Årsmelding for 2009
- Arbeidsprogram for 2010
- Rekneskap for 2009 og budsjett for 2010
- Jamvekt for 2009 og medlemspengesats for 2010
- Val
* av styre
* av utsendingar til landsmøtet i Norsk Målungdom
* av utsendingar til landsmøtet til Noregs Mållag

Styret sender ut sakpapira so snart dei er klåre.
Du må vera på e-postlista vår dersom du skal få sakpapira, eller be om at me sender dei i posten.

Alle medlemer er hjarteleg velkomne. Det vert enkel servering og ei
lita samkome etter at møtet er ferdig.

Beste helsing
Kristin Fridtun
for styret i SmiN

Me skal vera på Dragvoll, rom D111. Gildet tek til i 8-tida, og varar til om lag 9.00 (det vil seia at det er gløgt å koma ei god stund før 09.00, slik at det er mat att og tid til å tyggja!)

Studentmållaget diskar opp med brød, pålegg og drykk.
Merk: Du må vera medlem i laget for å nyta av den innkjøpte maten, men det er fullt lovleg å ta med eigen mat og eta den i lag med oss, dersom du av ein eller annan (utruleg) grunn ikkje er medlem i SmiN.

Hjarteleg velkomne til ein knallstart på ein “no-må-eg-lesa-til-eksamen”-dag!

Helsing frå styret

Psst! Bilete frå førre eksamensfrukosten kan du sjå her.

Møtet er ope for alle og det er ingen krav til førekunnskapar. Det einaste som trengst, er ein nyfiken hug og hjarte for nynorsk. Skrivaren i Norsk Målungdom, Eva Holthe Enoksen, leier møtet.

Me har lagt opp nokre tekster som det kan vera greitt å glytta på, mellom anna ‘Program for Noreg som fleirkulturelt samfunn’ (vedteke på NMU-landsmøtet i mars) og innleiingar av mållagskaren Ingar Arnøy og Kristin Fridtun. Desse kan de få tak i ved å senda oss ein e-post (styret@smin.no)

Møtet skal vera på Dragvoll, og det tek til klokka 19.00. Me møtest framfor Tapir bokhandel. (Meld ifrå dersom du treng hjelp til å finna fram)

Hjarteleg velkomne!

I dag er dialektbruk fullt ut akseptert i media (endå nokre dialektar er meir aksepterte/umarkerte enn andre). I NRK er alle slags dialektar tillatne so lenge det som vert sagt er forståeleg. Men på kva slags måte påverkar dialektbruken i media skriftspråka våre? Og kva er føremonene og ulempene ved auka bruk av normert tale? På kva slags måte er den utbreidde bruken av dialekt i media med på å stengja ute folk som er i ferd med å læra seg norsk? Kjem nynorsken til å verta styrkt dersom fleire tek han i bruk munnleg? Spørsmåla er mange, og det er meiningane òg. Dette vert eit spanande og lærerikt møte!

Interessante stykke og radioprogram:

Radio (NRK): Dialekt eller normert nynorsk?

Kronikk (Aftenposten): Når dialekt blir maktspråk

Det er sjølvsagt kostnadsfritt å vera med, og alle er velkomne anten dei har det eine eller andre målsynet. 

Vel møtt!

Helsing

SmiN-styret