I haust vert “systerlaget” vårt, Studentmållaget i Oslo (SmiO), 110 år. SmiN ynskjer SmiO til lukke! Dessutan vil me at so mange som råd skal få vita om og delta på det storstilte jubileumsseminaret dei skipar til. Seminaret skal vera i Oslo, Det Norske Teatret, frå laurdag 4. til sundag 5. september. Jubileumsseminaret er samkøyrt med det årvisse haustseminaret til Noregs Mållag.
No er programmet klart (sjå her). Her er stint med gode greier: Gjæve innleiarar og interessante emne. Og me skal ikkje gløyma jubileumsfesten på laurdagskvelden. 
Me i SmiN oppmodar alle SmiN-arar til å hiva seg med!
Seminaret er gratis for studentar (men festmiddagen kostar ein hundrelapp), og me gjev reisestønad til dei som vil fara. Me kan òg hjelpa til med å finna overnatting til dei som treng det. Påmelding til magnus.bernhardsen@nm.no so snart som råd. Andre praktiske meldingar finn de her.
Kom, kom!
For SmiN-styret
Kristin Fridtun
Det går mot sumar og semesterslutt, og denne gongen legg Studentmållaget i Nidaros sumaravslutninga til Ringve museum. Her finn me gamle musikkinstrument og vørdelege bygningar og barndomsheimen til sjøhelten Tordenskiold og ei triveleg kro og det er ikkje måte på!
Avslutninga skal vera sundag 6. juni, og me dreg ut til Lade med buss nr. 3 frå Munkegata, med avgang 11.05. Det er sjølvsagt lov å møta opp på museet òg. Det er gjævt om de seier frå på førehand om de har tenkt å vera med, men det er inga bindande påmelding e.l. Berre kom og ver med!
SmiN kostar billetten din, so ta med deg studentprovet ditt, for studentpris er fine greier.
Stutt sagt: SmiN-tur til Ringve museum sundag 6. juni, avgang 11.05 med 3′ern frå Munkegata.
Du kan lesa meir om Ringve museum her.
Tak med deg ein ven eller to og kom!
Studentmållaget i Bergen har laga nokre spildrande nye og ovende gilde klistremerke som vi rår dykk til å glytta på. Morosame saker! De kan tinga merka her.
Gode SmiN-arar, her kjem siste nytt frå laget:
“Eg stend eg, seddu” (Olav H. Hauge):
Studentmållaget kjem til å stå på stand på Dragvoll måndag 26. april (frå 11.00 til 14.00) – då er alle velkomne bortom til ein prat eller litt “munngodt” eller berre for å sjå litt på tilfanget me har. Me sel ordlister, Nynorsknøkkelen, jakkemerke, songbøker og slikt noko for ein rimeleg penge. Me i styret er huga på verta kjende med resten av lagslyden, so gleda vert stor om du stikk innom.
“Dei som har munn, søkjer mat” (gamalt ordtøke)
Torsdag 6. mai skipar me til eksamensfrukost. Gildet skal vera i rom D111 på Dragvoll (atter på Dragvoll…). Me tek til klokka 08.00 og reknar med å svelgja siste brødbiten innan klokka 09.00.
Studentmållaget ordnar med brød, pålegg, varm og kald drykk, papir og godt selskap – so berre kom som du er!
Me skal skipa til sumaravslutning òg, men det vert nærmare semesterslutt.
Vona er at me òg skal få i stand eit ope møte/studiemøte i vår, og me skal sjølvsagt melda ifrå både her og på e-postlista dersom det vert noko av.
Då står det berre att å ynskja alle lagslemer god vår og god eksamenslesing! (eller oppgåveskriving)
Gode lagslemer,
styret kallar inn til årsmøte i Studentmållaget i Nidaros (SmiN)
onsdag 3. februar. Møtet skal vera i BUL-lokalet i Dronningens gate
23, og møtet tek til *klokka 18.00*.
Saklista for årsmøtet ser slik ut:
- Årsmelding for 2009
- Arbeidsprogram for 2010
- Rekneskap for 2009 og budsjett for 2010
- Jamvekt for 2009 og medlemspengesats for 2010
- Val
* av styre
* av utsendingar til landsmøtet i Norsk Målungdom
* av utsendingar til landsmøtet til Noregs Mållag
Styret sender ut sakpapira so snart dei er klåre.
Du må vera på e-postlista vår dersom du skal få sakpapira, eller be om at me sender dei i posten.
Alle medlemer er hjarteleg velkomne. Det vert enkel servering og ei
lita samkome etter at møtet er ferdig.
Beste helsing
Kristin Fridtun
for styret i SmiN
